رسالة إلى المدرب واللاعبين : ( الإتحاد = الإتحاد )

--------------------------------------------------------------------------------

أولا مبروك من الأعماق للعيبتنا وللإدارة ولجميع من ساهم في إنتصاراتنا الرائعة في البطولة الآسيوية .

ثانيا كلنا عارفين إن المباراة الجاية يوم الأحد مع الإتحاد في جدة والنقطة إللي أبغى أقولها وفي الحقيقة أنا ذكرتها عدة مرات وذكرها الاعضاء في المنتدى كمان هي كيف نفوز على الإتحاد في جدة .

حقيقة الأمر أقلكم يالاعبينا المسألة ما تتعدى وبكل سهولة حاجة وحده، وهي أن لا تعطو الإتحاد أكثر من حجمه في النواحي النفسية ، يعني والله مشكلتنا الوحيدة الملاحظة هي أن كل مانلعب مع الإتحاد في جدة يكون الرعب والهلع مسيطر على اللعيبة ، وهذا هو مربط الفرس

وهذا إللي كنت أقصده بالعنوان ( الإتحاد = الإتحاد ) بمعنى إن الإتحاد مجرد فريق سعودي 11 لاعب .
المشكلة إللي تواجهنا بإستمرار بالذات في جدة للأسف إن معظم اللاعبين يدخل على إن ( الإتحاد = برشلونة ) أو ( الإتحاد = تشيلسي ) .
وهنا تحل الكارثة وتلاقي كراتنا كلها مقطوعة وخطوطنا متباعدة ومن اللحظات الأولى للمباراة نشعر أن لعيبتنا مسلمين المباراة،ومدافعين طول المباراة، وإذا بدأ الإتحاد بالتهديف للأسف مانقدر نرجع للمباراةوهذا كله يعود للسبب المذكور (الخوف ) غير المبرر .

طيب ليش هذا كله يالعيبة ؟؟

المسألة نفسية فقط لاغير يعني إحنا ماننكر أبدا إن الإتحاد منظم وعنده البديل ، بس الملاحظ إن الإتحاد لمن يحصل قدامه فريق خايف مايرحمه ، والله مايرحمه، يعني يعطيه على راسه حتى لو يهزمه 10 صفر .
لكن لمن يشوف الإتحاد الفريق الخصم يهاجم ويضغط على حامل الكره ويلعب رجل لرجل تلاقي نفسيتهم زي الزفت ويبدأو يتنرفزو وتضيع منهم المبارة .

وبالفعل الجزيرة الإماراتي بالأمس أعطانا درس مجاني للفريق الشجاع ، والله عجبوني وبصراحه كانو فريق شجاع ويبرد القلب ، ولولا لطف الله ثم براعة تيسير والله لخرج الإتحاد مهزوم ثلاثة أو أربعة، وأعطونا درس ثاني إن الجمهور مو كل حاجة يعني جمهور الإتحاد بالأمس رغم كثرته وتشجيعه المتواصل إلا أن أداء فريق الجزيرة لم يتأثر بالجمهورأبدا .

طيب هل عناصر الجزيرة الإماراتي أحسن من الإتفاق وهل خبرتهم في البطولات أكثر؟؟؟ ، بالتأكيد لأ .

بس إللي ميز الجزيرة ( الشجاعة ثم الشجاعة ثم الشجاعة )

عشان كذا أرجوكم ياللعيبتنا لاتعطو الإتحاد اكثر من حجمه ، إحترمو الخصم ألعبو بقتاليه ألعبو للفوز وأعيدها ( ألعبو للفوز )وبإذن الله حتكون النتيجة مرضيه .

وأخيرا أحب أذكركم مرة أخرى المعادلة جدا بسيطة رجاءا أحفظوها وذاكروها جيدا لأنها أكيد حتجي في الإختبار

(((( الإتحاد = الإتحـــاد ))))